Uyu munsi tariki ya 22 Kanama 2025, ku biro by'Akarere hateraniye inama yo gutegura igihembwe cy'ihinga 2026 A. Iyi nama yahuje abashinzwe ubuhinzi mu mirenge, abacuruzi b'inyongeramusaruro mu Karere, abakozi bashinzwe iterambere ry'abaturage mu Kagari ("SEDO") bahagarariye abandi, abafatanyabikorwa (Tubura, ARCOS, RAB..) yayobowe n'Umuyobozi w'Akarere Madamu Kayitesi Dative.

Intego y'ubuhinzi muri iki gihembwe akaba ari ukuzamura umusaruro ku buso bwa hegitari hakoreshejwe uburyo bwose bushoboka: guhingira ku gihe, gukoresha imbuto nziza n'ifumbire.

Madamu Kayitesi Dative yasabye abantu bose bireba kwihutisha imirimo yose y'ibanze ijyanye no gutegura igihembwe cy'ihinga harimo kugeza inyongeramusaruro ku bahinzi ku gihe, no gukangurira abahinzi gutegura imirima yabo neza ku gihe.

Abitabiriye inama bafashe umwanzuro ko igihembwe cy'ihinga 2026 A kigomba kuba cyamaze gutangizwa mu mirenge yose bitarenze tariki 5 Nzeri 2025.