Ku bufatanye n’Ikigo cy’Igihugu gishinzwe Ubuzima (RBC) ku nkunga ya UNICEF, ku biro by’Akarere habereye inama ntangamurongo kuri gahunda yo kumenyekanisha ibyago no gukangurira abaturage kubigiramo uruhare (Risk Communication and Community Engagement, RCCE), hamwe no gukoresha ikoranabuhanga mu gukumira no kurwanya ibyorezo.

Iyi nama yahuje abakozi b’akarere bashinzwe ubuzima, abanyamabanga nshingwabikorwa b’imirenge, abakuru b’imidugudu, abahagarariye amadini ndetse n’abayobozi b’ibigo nderabuzima. Abayitabiriye baganiriye ku buryo bwo kurushaho gukangurira abaturage no kubongerera ubumenyi ku ndwara zishobora gushyira ubuzima bwabo mu kaga zirimo Kolera, Ebola, Maseru, Mpox, Marburg, Malariya ndetse n’indwara ziterwa na virusi zitera kuva amaraso (VHFs).

Inama yayobowe n’Umuyobozi w’Akarere ka Rutsiro, Madamu Kayitesi Dative, ari kumwe na Bwana David Ndayishimiye na Bwana Saramba Eric abakozi  b’ihuriro ry’imiryango nyarwanda itari iya Leta ikora ibikorwa byo kurwanya SIDA no guteza imbere ubuzima.

Mu ijambo rye, Umuyobozi w’Akarere Madamu Kayitesi Dative yashimangiye ko gutanga amakuru ku gihe no kugira uruhare kw’abaturage ari ingenzi mu gukumira ibyorezo.

Yagize ati: “Abaturage ni bo rwego rwa mbere mu kwirinda no gukumira ibyorezo. Iyo abayobozi bo mu nzego z’ibanze n’abakozi bo ku isonga bahawe ubumenyi n’ibikoresho bikwiye, baba abafatanyabikorwa bakomeye mu kurinda ubuzima bw’abaturage.”

Yakomeje avuga ko ubufatanye hagati y’inzego z’ubuzima n’abayobozi b’inzego z’ibanze ari ingenzi mu kubaka imiryango ishoboye guhangana n’ibyorezo.

Yagize ati: “Intego yacu ni uko buri muturage agera ku makuru yizewe kandi ku gihe, ndetse akamenya uruhare rwe mu gukumira ikwirakwira ry’indwara.”

Iyi gahunda igamije kongerera ubushobozi abakozi bo ku isonga (FLFs) binyuze mu mahugurwa, gukoresha ikoranabuhanga ndetse no gukorera hamwe mu bikorwa byo gukangurira abaturage.

FLFs (Frontline Functionaries) azaba ari abakorerabushake bazahabwa amahugurwa ku byorezo bitandukanye, bahabwe ubumenyi buhagije ku buryo bazaba bafite ubushobozi bwo kumenya ibimenyetso by’icyorezo no gutanga amakuru ku gihe mu buryo bw’ikoranabuhanga rya telefoni. Mu karere hazaba hari FLFs 1000 hibandwa ku bice by’Akarere bifite ingorane zo kuba hakwaduka ibyorezo mu buryo bworoheje. Ibi bice ni ibyegereye ikiyaga cya Kivu, ibice bibamo ingendo zambukiranya imipaka, n’ahahurira abantu bingeri zinyuranye.