Ku bufatanye na NUDOR (National Union of Disability Organizations of Rwanda), binyuze mu mushinga wa Zero Out of School Children ushyirwa mu bikorwa na Save the Children ku nkunga y’Igihugu cya Qatar, mu Karere ka Rutsiro habaye igikorwa cyo gushyikiriza ibigo by’amashuri 13, kimwe muri buri Murenge, ibikoresho bigamije korohereza imyigire y’abana bafite ubumuga. Iki gikorwa kiri mu murongo wo guteza imbere uburezi budaheza no guharanira ko nta mwana usigara inyuma.

Ku rwego rw’Akarere, igikorwa cyabereye ku Kigo cy’Ishuri cya Kivumu, aho NUDOR yari ihagarariwe na Bwana Damascène Hafashimana, kikayoborwa n’Umujyanama wa Komite Nyobozi y’Akarere ka Rutsiro, Bwana Uwihanganye Jean Baptiste, washimiye abafatanyabikorwa ku ruhare rwabo mu gufasha Akarere gukemura bimwe mu bibazo bikigaragara mu burezi bw’abana bafite ubumuga.

Mu Karere ka Rutsiro habarurwa abana basaga 900 bafite ubumuga, aho ku Ishuri rya Kivumu higa 106 bafite ibyiciro bitandukanye by’ubumuga. Muri iki kigo, hashyizweho ibikorwa remezo birimo ubwiherero bwagenewe abafite ubumuga, inzira zorohereza kugenda kwabo, n’ibibaho byandikwaho byatunganyijwe mu buryo bubafasha kwiga neza. Hanabayeho guhugura abarimu 15 ku rurimi rw’amarenga, hakiyongeraho umwarimu wigisha ururimi rw’amarenga, mu rwego rwo kuzamura ireme ry’uburezi.

Nubwo intambwe igaragara imaze guterwa, haracyari imbogamizi zirimo abana bakiri mu miryango batagera ku ishuri, ibikoresho bikiri bike, ubuke bw’abarezi, n’imyumvire ya bamwe mu babyeyi bakigorwa no kwizera ko abana babo bafite ubumuga bashobora kwiga no gutera imbere.

Akarere ka Rutsiro kagaragaje ko kazakomeza ubukangurambaga n’ubuvugizi bigamije guteza imbere uburezi budaheza, cyane ko habarurwa abana 811 bafite ubumuga bataratangira ishuri. Ababyeyi n’abarezi bashimye igikorwa bavuga ko ari urufunguzo rw’icyizere ku bana bafite ubumuga, kikaba intangiriro y’impinduka zirambye mu mibereho yabo no mu iterambere rusange ry’Akarere.