Rutsiro: Hakomeje imyiteguro ya Kivu beach Expo and Festival.
Kuri uyu wa 6 Kanama 2025, ku bufatanye n'Ikigo cya Yirunga Ltd gikorera mu Karere ka Rubavu, mu Murenge wa Boneza kuri Rushel Kivu Resort habereye inama yahuje abikorera n'abayobozi hagamijwe gutegura igikorwa cya Kivu Beach Expo and Festival (Imurikagurisha n’Iserukiramuco). Inama yayobowe n'Umuyobozi w'Akarere Madamu Kayitesi Dative.
Kivu Beach Expo and Festival ni gahunda igamije guteza imbere ubucuruzi, ubukerarugendo, ubuhanzi n'umuco binyuze mu kumenyekanisha ibyiza nyaburanga biherereye mu Karere ka Rutsiro n’ibihakorerwa. Mu gihe ibikorwa bya Kivu Beach Expo and Festival biba bishyirwa mu bikorwa, habamo umwanya wo kumurika no kugurisha serivisi n’ibintu bitandukanye, abahanzi bataramira abitabiriye, ubukangurambaga kuri gahunda za Leta, gusobanurirwa serivisi zitandukanye zitangirwa mu Karere, n'ibindi.
Intego za Kivu Beach Expo and Festival.
Kivu Beach Expo and Festival ifite intego zikurikira:
- Kwamamaza no guteza imbere hotels
- Kongera ishoramari n'imisoro mu Karere
- Kwagura isoko ry'ibikorerwa mu Karere ka Rutsiro
- Kumenyesha abaturage serivisi zitangirwa mu Karere,
- Gukangurira abaturage gahunda za Leta
Muri iyi nama, abitabiriye bahuriye ku mwanzuro w'uko iki gikorwa gikwiye gutegurwa neza kikazaba gahunda y'Akarere ihoraho ariko mu kwezi k'Ukuboza 2025 hakazakorwa Kivu Beach Expo and Festival y'iminsi 5.
Madamu Kayitesi yashimiye abafatanyabikorwa ku ruhare bagira mu bikorwa biteza imbere ubukerarugendo mu Karere, aho bigira uruhare mu kuzamura ubukungu bw’Akarere n’Igihugu muri rusange.