Mu gihe cy’iminsi 3, guhera tariki ya 9 kugera tariki ya 10 Kamena 2026, mu Karere ka Rutsiro hakozwe ubukangurambaga buhuriweho bugamije kurwanya no gukumira ubucukuzi n’ubucuruzi butemewe bw’amabuye y’agaciro ndetse n’ihohotera rikorerwa abana. Ubu bukangurambaga bwateguwe ku bufatanye na ITSCI (International Tin Supply Chain Initiative). 

Abagize itsinda ry’ubukangurambaga bari abayobozi b’inzego z’umutekano mu Karere, umukozi uhagarariye ITSCI Bwana GATABAZI Elvis, Umukozi uhagarariye Ikigo cy’Igihugu Gishinzwe mine, peteroli na gaze, n’abakozi bahagarariye Ihuriro ry’Igihugu rw’Ubucukuzi. Itsinda ryari riyobowe n’Umuyobozi w’Akarere Wungirije Ushinzwe Iterambere ry’Ubukungu Bwana UWIZEYIMANA Emmanuel.

Ubu bukangurambaga bwakorewe mu Mirenge 5 ya Mukura, Rusebeya, Nyabirasi, Kivumu na Murunda. Abagize itsinda basuye ahantu hatandukanye hakorerwa ubucukuzi butemewe hanyuma bakagirana ibiganiro n’abaturage batandukanye ku bucukuzi n’ubucuruzi bw’amabuye y’agaciro no ku ihohotera rikorerwa abana.

Abaturage bibukijwe ingaruka z’ubucukuzi n’ubucurizi bw’amabuye y’agaciro butemewe aho bwangiza ibidukikije, butera imfu za hato na hato ku babukora, guteza amakimbirane mu ngo, igifungo n’ihazabu mu gihe ubukora abufatiwemo ndetse akabuhamywa n’urukiko. 

Uwakoze ubucukuzi cyangwa ubucuruzi butemewe ahabwa ibihano biremereye mu buryo butandukanye. Iyo umuntu ahamijwe icyaha cyo gucukura mu buryo butemewe ahanishwa igifungo gishobora kugera ku myaka 5 n’ihazabu y’amafaranga agera kuri miliyoni 50. Iyo uyafatanywe uyabitse mu buryo butemewe, igifungo gishobora kugera ku myaka 3 ariko ihazabu ikagera kuri milioni 60.  Umuntu wemera ko ubutaka bwe bukorerwaho ubucukuzi butemewe n'amategeko ntabitangire amakuru, ahanishwa igifungu cy'imyaka 1-3  n'ihazabu ishobora kugera kuri miliyoni 50.

Ku bufatanye n’Urwego rw’Igihugu rw’ubugenzacyaha (RIB), abaturage basobanuriwe amoko y'ihohotera ariko yibanda ku ihohotera rikorerwa abana. Abaturage basabwe kugira uruhare mu kurikumira no gutanga amakuru aho barikeka. Ihohotera rikorerwa abana harimo kubasambanya, kubatesha ishuri, kubakoresha imirimo ivunanye, n’ibindi.

Ubu bukangurambaga bukaba bugamije ko abaturage batandukana burundu no gukora ubucukucuzi n’ubucuruzi bw’amabuye y’agiciro mu buryo butemewe. Bugamije kandi kurinda abaturage guhura n’ibihano biremereye batarabisobanuriwe.