Uyu munsi ku wa 16 Gashyantare 2026, mu Karere ka Rutsiro hashojwe urugerero rw'inkomezabigwi 13. Ku rwego rw'Akarere, igikorwa cyayobowe n'Umuyobozi w'Akarere Madamu Kayitesi Dative kibera mu Murenge wa Mushubati hazirikanwa insanganyamatsiko igira iti: "Duhamye umuco w'ubutore twimakaza ubumwe n'ubudaheranwa"

Mu Karere kose, intore 1188 ni bo barangije urugerero. Mu itorero, intore zahawe ibiganiro ku mateka y'igihugu, zifasha mu kubakira abatishoboye inzu cyangwa ubwiherero, no gukora imyitozo ngororamubiri.

Afande Charles RUBYOGO yagarutse ku kamaro k’itorero harimo kwigishwa amateka yaranze uRwanda, kurwanya ibiyobyabwenge, gufasha abitabira itorero kugira ubuzima bwiza hakorwa imyitozo ngororamubiri no gukora imirimo y'amaboko ifitiye Igihugu akamaro: kubakira abatishoboye, kubaka imirima y'ibikoni ifasha mu gutegura indyo yuzuye n’ibindi.

Yagize ati: “kujya mu itorero ntibikabe umuhango. Ni umuco Nyarwanda! Ni ho abanyarwanda barererwa bagatozwa indangagaciro zibereye umunyarwanda. Ku rugerero twiga guharanira kwigira. Ushaka kugutera inkunga akazaza nyuma.

Mu ijambo rye, Madamu Kayitesi yashishikarije abanyeshuri barangiza amashuri yisumbuye kwitabira urugerero cyane ko utazitabira urugerero hari amahirwe ashobora kwibuza harimo kujya muri kaminuza, kujya mu ngabo z'Igihugu, kubona akazi, n'andi mahirwe.

Madamu Kayitesi yibukije urubyiruko gushishikarira umurimo bagakora bakiteza imbere. Yabasabye gushyira imbaraga muri gahunda zitandukanye za Leta. Yabasabye kandi gutekereza cyane bakareba amahirwe abakikije bakayabyaza umusaruro.

Agaruka ku muco-nyarwanda, Madamu Kayitesi yasabye urubyiruko kunoza ururimi rw'Ikinyarwanda bagaharanira kuruvuga mu buryo bunoze.

Yakomeje akebura abana b'abakobwa aho yabibukijee ko badakwiye kwihutira gushinga urugo. Yababwiye ko n'ubwo itegeko itegeko ryemerera umukobwa kuba yashinga urugo mu gihe arengeje imyaka 18 abiherewe uburenganzira n’umuyobozi ubifitiye ububasha, atari byiza kwihuta gushaka utabiteguye neza.

Uru rugerero rw’Inkomezabigwi  icyiciro cya 13, rwatangiye ku wa 13 Mutarama 2026.