Uyu munsi tariki ya 29 Gashyantare 2024, mu karere ka Rutsiro hatangijwe igihembwe cy’Ihinga 2024B.

Mu gutangiza iki gihembwe, Umuyobozi w'Akarere Madamu Kayitesi Dative, Umuyobozi w'Akarere Wungirije Ushinzwe Iterambere ry'Ubukungu Bwana Uwizeyimana Emmanuel, Umuyobozi wa RAB ishami rya Gakuta Bwana Kimenyi Martin  n'Umuyobozi w'Inkeragutabara mu Karere Maj Charles Rubyogo n’abandi bayobozi mu byiciro bitandukanye bifatanyije n'abaturage bo mu Murenge wa  Mushonyi mu gutangiza igihembwe cy'ihinga 2024B.

Igihembwe cyatangijwe haterwa imbuto y'ibishyimbo mu Kagari ka Rurara, Umudugudu wa Kashishi. Hatangizwa iki gihembwe abahinzi bibukijwe guhinga neza bakoresha ifumbire y’imborera n'imvaruganda. Basobanuriwe kandi uburyo bwo gutera imbuto y'indobanure n'inyungu bizanira Umuhinzi harimo kongera umusaruro abona.

Abahinzi bibukijwe kuzigama k'umusaruro baba babonye ntibawumarire ku isoko cyangwa se ngo bawusarure utarera neza kubera ko bituma Umuhinzi atihaza mu biribwa. Madamu Kayitesi yagize ati: “ abahinzi ntimukwiye gusarura imyaka itarera kubera gushukishwa amafaranga. Iyo umucuruzi abikuguzeho urahindukira ukabimuguraho biguhenze. Kandi iyo utabashishije kuzigama umusaruro mu gihembwe kimwe ukawumarira ku isoko, umusaruro w’ikindi gihembwe uboneka urugo rwarashonje.”

Nyuma yo guhinga no getera imbuto y’ibishyimbo mu mirima y’abaturage, bibukijwe ko bagomba guhinga imirima yose hatagize n’umwe usigaye mu rwego rwo kwihaza mu biribwa. Abaturage bashishikarijwe kandi kwiyandikishaho ubutaka batunze butarandikwa. Madamu Kayitesi yibukije abaturage ko Leta yaborohereje aho umuturage ufite akajeto (jeton) k'umurima we awandikwaho ku buntu; bigakorerwa ku rwego rw'umudugudu.

Madamu Kayitesi kandi yibukije abaturage ko gutunga irangamuntu ari uburenganzira bw'umuturage. Abaturage bashishikarijwe kuzitunga abatarazibona, bakifotoza, bagakorerwa indangamuntu. By'umwihariko, umuhinzi yibukijwe ko irangamuntu imufasha kubona serivisi zitandukanye harimo no kubona nkunganire.