Uyu munsi tariki ya 23 Gicurasi 2025, mu Karere ka Rutsiro habereye inama yateguwe n'Akarere ku bufatanye n'umushinga WE-ACTX FOR HOPE. Inama yabereye kuri Hotel Ubumwe iherereye mu murenge wa Mushubati ifungurwa  n'Umuyobozi w'Akarere Wungirije ushinzwe imibereho myiza y'abaturage Madamu Umuganwa Marie Chantal.

Iyi nama yari igamije gutangiza ibikorwa by'umushinga WE-ACTX FOR HOPE mu Karere ugamije gukumira no kugabanya ubwandu bw'Agakoko gatera SIDA. Hakizimana Leon akaba n'Umuyobozi w'uyu mushinga ni we  wari uwuhagarariye  2 ari kumwe na Dr. Pacifique, .

Iyi nama yitabiriwe n'abayobozi b'imirenge uzakoreramo 6: Gihango, Mushubati, Ruhango, Kigeyo, Manihira na Murunda, abayobozi b'ibigo nderabuzima bikorera muri iyo mirenge, abahagarariye inama z'Igihugu (abagore, urubyiruko n'abafite ubumuga), abahagarariye abakora umwuga w'uburaya, ababana bahuje ibitsina, ibitaro bya Murunda, abakozi b'Akarere batandukanye n'abandi.

Muri iyi nama hagaragajwe amakuru atandukanye ku miterere y'ubwandu bw'Agakoko gatera SIDA muri rusange mu gihugu hose no mu Karere. Abitabiriye bagaragarijwe impungenge umushinga ufite w'aho ibikorwa by'ubukangurambaga byadohotse mu baturage bityo bikaba bishobora gukoma mu nkokora umugambi wa Leta wo kuba nta bwandu bushya bukigaragara mu Rwanda mu mwaka wa 2030.

Izindi mpungenge umushinga wagaragaje n'uko hari abantu batazi uko bahagaze ku bijyanye n'ubwandu bwa SIDA kandi badafite n'ubushake bwo kwipimisha, kuba hari abafite ubwandu badafata imiti uko bikwiye bigatera impungenge ko bakomeza kwanduza abaturage, kuba ubwandu bwiganje cyane mu rubyiruko cyane cyane igitsina gore kiri munsi y'imyaka 24, kuba abaturage bagifite amakuru adahagije ku buryo umuntu ufite ubwandu yitabwaho bikagera n'aho adadashobora kwanduza n'izindi.

Kubera iyo mpamvu, umushinga wagaragaje ko uzita ku gukemura izi mbogamizi hakongerwa ubukangurambaga, gupima abantu ku bushake, kwigisha abakora umwuga w'uburaya ku myitwarire idashyira ubuzima bw'abaturage mu byago byo kwandura SIDA, kuzafasha kubona serivisi z'ubwirinzi, guhugura abajyanama b'urungano ku burenganzira n'imikoreshereze ya serivisi z'ubwirinzi n'ibindi.

Bwana Hakizimana Leon akaba yagaragaje ko uyu umushinga utagamije guteza imbere ibikorwa by'uburaya cyangwa gushyigikira abamaze kwandura ahubwo ugamije kurinda abaturage kwandura ndetse no gufasha abanduye kwiyakira no kugabanya ibyago byo kwanduza abandi. Yasabye abaturage gusobanukirwa ko umuntu wanduye adakwiye guhabwa akato kuko bitiza umurindi abantu bagatinya kwipimisha, uwamenye ko yanduye akabihisha cyangwa akanga gufata imiti kugira ngo bitazamenyekana. Yavuzeko mu gihe aba bantu begerewe bakaganizwa byarushaho gutuma bagira uruhare mu kwitabira serivisi no kugabanya ibyago byo kwanduza abandi.

Nk'uko byagarutsweho na Dr. Pacifique, umuntu ufite ubwandu bw'agakoko gatera SIDA ufata imiti uko bikwiye mu gihe cy'amezi atandatu Virusi iba itakigaragara mu maraso kandi iki gihe akaba atakwanduza undi muntu. Uyu muntu kandi abaho ubuzima bwe mu gihe kingana n'icyo yari kuzamara nk'umuntu udafite ubwandu.

Ibikorwa by'uyu mushinga bizamara imyaka 2.