Uyu munsi tariki ya 15 Mata 2025, ku biro by’Akarere ka Rutsiro habereye inama yatangirijwemo umushinga wo gukora igishushanyo-mbonera cy’imikoreshereze y’ubutaka mu Karere. Akarere kari gasanzwe nta gishushanyo-mbonera cyimbitse gafite.

Iyi nama yayobowe n’Umuyobozi w’Akarere Wungirije ushinzwe iterambere ry’ubukungu Bwana Uwizeyimana Emmanuel wari kumwe n’umukozi wari uhagarariye Minisiteri y’Ibidukikije Bwana Byiringiro Onesphore, Umukozi w’Ikigo cy’Igihugu gishinzwe imicungire y’ubutaka Bwana Rungano Didier, Umuyobozi w'umushinga wa "Global Green Growth Institute" Rwanda Bwana Jean Pierre Munyeshyaka n’abakozi b’ikigo cy’impuguke bazashyira uyu mushunga mu bikorwa bahagarariwe na Bwana Ashimwe Joshua. 

Iyi nama yitabiriwe n’abayobozi batandukanye harimo abanyamabanga nshingwabikorwa b’Imirenge, ab’ Utugari, abakozi bashinzwe imicungire y’ubutaka mu Karere no mu Mirenge n’abahagarariye inzego z’umutekano.

Uyu mushinga uzashyirwa mu bikorwa k’ubufatanye bw’Ikigo Mpuzamahanga Global Green Growth Institute (GGGI) Rwanda, Ikigo cy’Igihugu cy’Ubutaka n’Ikigo cy’Igihugu gishinzwe kurengera ibidukikije mu Rwanda.

Uyu mushinga ukaba witezweho gukemura ibibazo bitandukanye bijyanye n’imikoreshereze y’ubutaka harimo gukemura ikibazo cyo kubaka mu kajagari, gushyira ibikorwaremezo ahadakwiriye, gukorera ubuhinzi cyangwa ubworozi aho bitajyanye, gukora imihanda, ibibuga, ahagenewe kuruhukira rusange n’ibindi.

Biteganyijweko uyu mushinga uzashyirwa mu bikorwa mu gihe cy’amezi 8.

Bwana Uwizeyimana akaba yasabye abayobozi kuzorohereza abazashyira mu bikorwa uyu mushinga babaha amakuru yose akenewe kugira ngo uzagende neza.

Nyuma y’uko iki gishushanyo kizaba kimaze kurangizwa, biteganyijweko kizubahirizwa kugeza mu mwaka wa 2050 aho biteganyijwe ko gishobora kuvugururwa mu mwaka wa 2035. Mu gihe kizaba gishyirwa mu bikorwa, birashoboka ko inzego zibifitiye ububasha zishobora guhindura imikoreshereze y’ubutaka mu gace runaka.