Uyu munsi tariki ya 20 Gashyantare 2024, mu karere ka Rutsiro habaye ibirori byo gutaha ibyumba by’amashuri 8 n'ubwiherero 12 byubatswe ku rwunge rw'amashuri rwa Kavumu mu murenge wa Ruhango. Ibi byumba byubatswe n’umufatanyabikorwa Fly and Help (bisobanuye “tega indege ufashe” ugenekereje mu Kinyarwanda) binyuze mu mubano w’Igihugu cy’URwanda n’Intara ya Rhenanie Palatinat yo mu gihugu cy’Ubudage.

Usibye abanyeshuri basaga 1500 biga kuri iri shuri, ibi birori byitabiriwe n’abayobozi batandukanye harimo Nyir'Icyubahiro Musenyeri wa Diyosezi ya Nyundo Mwumvaneza Anaclet, Umuyobozi w’Akarere Wungirije Ushinzwe Iterambere ry’Ubukungu Bwana Uwizeyimana Emmanuel, Heike Raab, Umunyamabanga akanaba uhagarariye  Leta ya Rhenanie Palatinat, Umuyobozi wa Fly and Help ku rwego rw’isi, Reiner Meutsch, n'intumwa za Rhenanie zitandukanye.

Mu marangamutima ye, Reiner yagaragaje ko Fly and Help yishimira ko ibikorwa ikora bigira uruhare mu guteza imbere uburezi n'iterambere ry'abaturage muri rusange. Yijejeko Fly and Help izakomeza gufasha ikigo cy’ishuri rya Kavumu kuvugurura ibyumba bishaje uko ubushobozi buzagenda buboneka.

Heike Raab yashimiye abafatanyabikorwa bagize uruhare mu gutuma ibikorwa byo kubaka amashuri n’ubwiherero bigerwaho harimo abatanze amafaranga, abayakira n'abakurikirana imikoreshereze yayo. Yashimiye kandi abayobozi bakurikirana ishyirwa mu bikorwa ry'imishinga uko bikwiye bagafasha mu kuyirangiza neza.

Bwana Uwizeyimana Emmanuel yashimiye intara ya Rhenanie n’abayobozi bayo yizeza ko ubuyobozi, ku bufatanye n’abaturage, bazarinda ibyagezweho, bakabigirira isuku uko bikwiye. Yasabye abanyeshuri kubyaza aya mahirwe yo kwigira heza umusaruro ufatika bakiga bashyizeho umwete nta mwana wongeye guta ishuri. Ati: "ibi byumba n'ubwiherero byubatswe byitezweho kuzamura ireme ry'uburezi kuberako ryoroshya imyigire n'imyigishirize aho bigira uruhare mu kugabanya ubucucike mu ishuri. Ibi bitumwa umwarimu yigisha yisanzuye akanabona uko akurikirana abanyeshuri."

Nyir’Icyubahiro Musenyeri Mwumvaneza yashimye ubufatanye busaga imyaka 40 Rhenanie ifatanya n’URwanda mu guharanira ko ireme ry’uburezi rizamuka. Yasabye abarezi gutanga ubumenyi bukwiye no gutoza abanyeshuri kugira intego z’ubuzima bwabo. By’umwihariko, yasabye abanyeshuri kwita ku byumba by’amashuri byubatswe birinda kubyangiza cyangwa kubigirira umwanda.

Ibi birori byashojwe no gusura ibyumba n’ubwiherero byubatswe aho abashyitsi bishimiye ko byubatswe mu buryo burambye.

Gutaha ibi bikorwa remezo bikaba byahujwe no kwishimirako iki kigo cy’ishuri cyuzuza umubare w’ijana (100) mu bigo by’amashuri Fly and Help yafashije mu Rwanda.

Umubano w’URwanda n’intara ya Rhenanie Palatinat ukaba usaga imyaka mirongo ine (40).