Uyu munsi tariki 19 Mata 2026, mu Murenge wa Ruhango ahazwi nka Bitenga mu Kagari ka Gihira habereye igikorwa cyo Kwibuka ku nshuro ya 32 Jenoside yakorewe Abatutsi mu 1994. Madamu Kayitesi Dative, Umuyobozi w’Akarere ka Rutsiro, ari kumwe n’abayozi b’inzego z’umutekano mu Karere, bifatanyije n’abaturage b’Umurenge wa Ruhango, incuti n’abavandimwe baturutse mu bice bitandukanye by’Igihugu. 

Mu kiganiro cyatanzwe na Nganizi Muhoranyi Faustin kuri Jenoside yakorewe Abatutsi, yagaragaje uburyo Jenoside yakorewe Abatutsi yateguwe kandi igashyirwa mu bikorwa imiryango mpuzamahanga ireberera. Bwana Nganizi yakomeje agaragaza ko ingengabitekerezo ya Jenoside igihari mu byiciro bitandukanye harimo abana bakomoka ku babyeyi bakoze Jenoside, asaba abayifite kwitandukanya na yo bagaharanira ko habaho ubumwe bw’Abanyarwanda. Yagize ati: “amahitamo y’Abanyarwanda no kwishakamo ibisubizo ni intego ya buri wese.” 

Bwana Nganizi yagarutse kuri gahunda zitandukanye zigamije kwimakaza ubumwe bw’abanyarwanda no kurandura ingengabitekerezo ya Jenoside harimo itorero ry’abanyarwanda, gahunda ya Ndi Umunyarwanda, na gahunda ya gira inka Munyarwanda. Yagize ati: “ubunyarwanda buruta ikindi kintu cyose umuntu yashingiraho.”

Buronyi Berchmans, Umuturage warokotse Jenoside yakorewe Abatutsi, yatanze ubuhamya ku nzira y’umusaraba Abatutsi banyuzemo bahigwa mu gihe cya Jenoside kugeza ubwo yahagarikwaga n’Inkotanyi mu 1994. Yagarutse ku bugome Jenoside yakoranywe ashimira inkotanyi zayihagaritse. Yagize ati: “ubu turatekanye, dufite aho turi, dufite abo tubana twarabyaye, abana bacu bari mu ishuri. Turashimira Leta y’Ubumwe bw’Abanyarwanda.”

Gasominari Amiel, Perezida wa IBUKA mu Murenge wa Ruhango,yasabye kuba hafi y’abarokotse Jenoside yakorewe Abatutsi mu 1994: “muri ibi bihe byo kwibuka turasabwa kuba hafi y’abarokotse. Twese hamwe dufatanye ingamba zo kubaka igihugu cyacu, duharanire gukomeza kwiyubaka kugira ngo imibereho yacu ikomeze gutera imbere.”

Umuyobozi w’Akarere ka Rutsiro Madamu Kayitesi Dative yagaragaje ko hakiri imbogamizi y’ingengabitekerezo ikigararagara hirya no hino, imibiri ikigaragara ndetese ikagaragara atari uko yagaragajwe; ahubwo ikaboneka ari uko hakozwe ibikorwa bya Leta. Ibi biracyakoma mu nkokora gahunda ya Ndi Umunyarwanda.

Yagrutse kandi ku bahamwe n’ibyaha bya Jenoside bakaba barafunguwe batarahindutse uko bikwiye bagakomeza bahembera urwango ku babakomokaho.  Yagize ati: “Twirinde kandi turwanye n’ingengabitekerezo ya Jenoside aho iva ikagera. Dukomeze kwibuka twiyubaka, ibyabaye ntibizongera!”

Yagize ati: “dufite umukoro wo kwiyubaka. Hari aho twageze nk’Abanyarwanda ariko hari ibyo dusabwa. Gutwazanya tukibuka twiyubaka, kudaheranwa n’amateka tukajyendana n’iterambere Igihugu kigezeho. Turasabwa kandi nk’abayobozi kugira ngo dufashe abarokotse Jenoside bafite imbaraga nke.” Yakomeje agira ati: “hari abageze mu za bukuru bakeneye ubufasha  butandukanye. Turabasaba ko iyi miryango twajya tuyishyira imbere muri gahunda za Leta nka gira inka n’izindi. Turashimira abaturage baje uyu munsi kugira ngo twifatanye. Dufite umukoro ukomeye wo kugaragariza abadukomokaho ko igihugu cyiyubatse.” 

Igikorwa cyo kwibuka cyashojwe no kunamira no gushyira indabo ku rwibutso rwa bitenga rushyinguyemo abantu 396.