Ku biro by’Akarere habereye inama igamije gusuzuma imigendekere y’igihembwe cy’ihinga 2026 A no gutegura neza igihembwe cy’ihinga 2026 B. Iyi nama yayobowe na Visi Meya ushinzwe Ubukungu, Bwana Uwizeyimana Emmanuel, yitabirwa n’abakozi bashinzwe ubuhinzi ku rwego rw’Akarere no mu Mirenge, abacuruzi b’inyongeramusaruro ndetse n’abafatanyabikorwa barimo KILIMO TRUST, TUBURA na RWAARI.

Mu kiganiro cyatanzwe na KILIMO TRUST, hatanzwe ibisobanuro ku mahirwe ari mu mushinga PSAC (Promoting Smallholder Agro-export Competitiveness Project), ushyirwa mu bikorwa na NAEB ku bufatanye na KILIMO TRUST, ku nkunga ya IFAD (International Fund for Agricultural Development). Uyu mushinga ugamije gufasha abahinzi bato n’abahinzi banini, amakoperative ndetse n’abohereza ibihingwa mu mahanga kubona inkunga nyunganizi (matching grant) ibafasha kongera ubushobozi no kuzamura ubuziranenge bw’umusaruro.

Inkunga nyunganizi itangwa ku bihingwa by’ingenzi birimo ikawa, icyayi n’imboga n’imbuto, hashingiwe ku cyiciro cy’uwusaba, yaba umuhinzi ku giti cye, koperative cyangwa rwoiyemezamirimo wohereza ibihingwa mu mahanga. Abahinzi n’amakoperative bakanguriwe kwitabira aya mahirwe, bagategura imishinga yujuje ibisabwa kugira ngo babone iyi nkunga ibafasha kwagura ibikorwa byabo no kongera ubushobozi bwo guhangana ku isoko mpuzamahanga.

Nubwo hari intambwe imaze guterwa, inama yagaragaje imbogamizi zitandukanye zirimo abaturage biyandikisha biguru-ntege muri gahunda yo gufata inyongeramusaruro, abakozi bakurikirana ubuhinzi mu mirenge badashyiramo imbaraga zihagije mu gushishikariza abaturage kwiyandikisha, ndetse n’abacuruzi b’inyongeramusaruro badakora kinyamwuga cyangwa bagahagarika ibikorwa batabimenyesheje inzego zibishinzwe.

Mu rwego rwo gutuma igihembwe cy’ihinga 2026 B kigenda neza, hafashwe ingamba zirimo kongera ubukangurambaga bukorwa n’abakozi bashinzwe ubuhinzi, gukurikirana no kuganira n’abacuruzi b’inyongeramusaruro batubahiriza inshingano zabo, no kunoza imikoranire n’abafatanyabikorwa. Ubuyobozi bw’Akarere bwashimangiye ko imikoranire myiza, ubwitabire bw’abahinzi no gukurikirana hafi gahunda zose ari byo bizafasha kuzamura umusaruro no guteza imbere ubuhinzi burambye.