Uyu munsi tariki ya 25 Ukwakira 2025, mu Karere ka Rutsiro habaye Umuganda ngarukakwezi usoza Ukwakira 2025. Umuganda wabereye mu Mirenge yose igize Akarere ka Rutsiro wibanda ku gutera ibiti. 

Ku rwego rw'Akarere, Umuganda wabereye mu murenge wa Kivumu mu Mudugudu wa Karungu ahatewe ibiti hakanazihirikanwa umunsi mpuzamahanga wo kurwanya ibiza no kugabanya ingaruka ziterwa na byo. Minisitiri wa Minisiteri ishinzwe ibikorwa by'Ubutabazi Maj. Gen. (Rtd) Albert Murasira yifatanyije n'abaturage b'Akarere ka Rutsiro. Minisitiri yari kumwe n’abandi bayobozi batandukanye harimo Umuyobozi w’Akarere ka Rutsiro Madamu Kayitesi Dative, abayobozi b’Akarere Bungirije, abahagarariye imiryango mpuzamahanga, abahagarariye amashami y’Umuryango w’Abibumbye mu Rwanda, n’abandi bafatanyabikorwa banyuranye. 

Muri uyu muganda, hatangijwe igihembwe cyo gutera ibiti, hahomwa inzu zubakiwe abasenyewe n'ibiza ndetse hanazirikwa ibisenge byazo mu gushishikariza abaturage kubaka inzu zidaha icyuho ibiza.

Abafatanyabikorwa batandukanye bitabiriye uyu muganda: WFP_Rwanda, WHORwanda, Minisiteri y'Ingabo(ihagarariwe), Caritas Nyundo, IOM Rwanda, Save the Children, Rwandaredcross.bashimiwe uruhare rwabo mu gufasha no kwita ku bahuye n'ibiza.

Mu ijambo rye, Madamu Kayitesi Dative, Umuyobozi w'Akarere ka Rutsiro yashimiye Ubuyobozi bw'igihugu ku kwita ku baturage aho bwagobotse abaturage bukabafasha gushyira igishyika n'igihunga ubuzima bugakomeza batekanye abasenyewe n'ibiza bakubakirwa, abandi bakaba bacyubakirwa.

Mutuyimana Brigitte (izina yahawe), umuturage watanze ubuhamya yashimye ibyo Leta yabafashije nyuma yo guhura n'isanganya ry'ibiza, yagaragaje ko ubu babayeho neza kandi batekanye ageraranya imidugudu bubakirwa n'umugi wa Kigali.

Maj. Gen. (Rtd) Albert Murasira, yashimiye abaturage ku bwo kumva ko ibikorwa Leta ibakorera abasaba kubisigasira bikaramba. Mu kwirinda ibiza, Minisitiri yakanguriye abaturage kureka gutura mu manegeka bakitabira gutura neza kandi bakirinda ibintu byose byabateza Ibiza.