Mu Karere ka Rutsiro ku bufatanye na UNESCO binyuze muri Komisiyo yayo mu Rwanda (CNRU), hizihijwe Umunsi Mpuzamahanga wahariwe ibyanya bikomye byabereye ku cyicaro cya Pariki y’Igihugu ya Gishwati-Mukura ikaba n’icyanya gikomye giherereye mu Murenge wa Kigeyo. Ibi birori byamaze iminsi ibiri byagaragaje akamaro ko kubungabunga ibidukikije no guteza imbere iterambere rirambye mu byanya bikomye.

Ibirori byafunguwe n’ijambo ry’ikaze rya Dr. Christine GASINGIRWA, Umuyobozi wa Komisiyo ya UNESCO mu Rwanda (CNRU), Bwana Christophe MUDAHEMUKA, Umunyamabanga Nshingwabikorwa w’Umurenge wa Kigeyo, ndetse na Bwana Anaclet BUDAHERA, Umuyobozi wa Pariki y’Igihugu ya Gishwati-Mukura.

Ku munsi wa mbere, abitabiriye ibiganiro bahaye umwanya ibiganiro byibanze ku kamaro k’ibyanya bikomye n’impamvu ari ingenzi kubibungabunga. Bwana Anaclet Budahera wari uhagarariye RDB muri ibi birori yatanze ikiganiro ku byagezweho mu kubungabunga urusobe rw’ibinyabuzima rya Gishwati-Mukura, mu gihe Ir. Dominique MVUNABANDI, Umuyobozi w’Ishami ry’Ikoranabuhanga, Ubumenyi no guhanga ibishya, asobanura impamvu y’ingenzi yo kwizihiza uyu munsi mpuzamahanga. Abitabiriye bashimye ibikorwa biri gukorwa mu kubungabunga ibidukikije, biyemeza gukomeza kwamamaza no gushyigikira ibikorwa byo kubirinda.

Ku munsi wa kabiri, hakurikiyeho ibikorwa byo gusura ibikorwa bitandukanye bigamije kubungabunga ibidukikije. Abitabiriye basuye Koperative y’abagore CODACE ikora umwuga w’ubworozi bw’inzuki, bashima uruhare rwabo mu kurengera ibidukikije no guteza imbere gahunda y’imyororokere y’ibihingwa. Bateye ibiti by’imbuto, basura Uruganda rutunganya ubuki rwa Rutsiro (Rutsiro Honey Processing Factory) basogongera ku buki bwiza bw’umwimerere, hanyuma basura Pariki y’Igihugu ya Gishwati-Mukura aho banyuzwe n’ubwiza bw’amashyamba n’inyamaswa zirimo inkende zifite ibara risa na zahabu (golden monkeys).

Ibirori byasojwe no gutanga ibikoresho by’ubworozi bw’inzuki—birimo imizinga y’inzuki, imyambaro yo kwirinda, n’ibikoresho byo gutunganya ubuki—kuri koperative eshatu ziyobowe n’abagore. Umuhango wo gusoza wayobowe na Bwana Emmanuel UWIZEYIMANA,Umuyobozi w’Akarere Wungirije Ushinzwe iterambere ry’Ubukungu, washimangiye ko Akarere n’abafatanyabikorwa bako bazakomeza gushyigikira imibereho irambye no kurengera ibidukikije.

Ibi birori byagaragaje ubufatanye hagati y’abaturage, Akarere ka Rutsiro, na UNESCO-CNRU mu guteza imbere ibikorwa byo kurengera no gucunga neza Icyanya gikomye cy’Isi cya Gishwati-Mukura.