Ku bufatanye na Minisiteri y’Ubutabera n’Umuryango w’Ubumwe bw’Uburayi, habaye igikorwa cy’ubukangurambaga kuri Politiki yo gukemura amakimbirane hatisunzwe inkiko (ADR) cyabereye muri santeri ya Gakeri mu Murenge wa Ruhango, Akarere ka Rutsiro. Uyu bukangurambaga bwitabiriwe n’Umushyitsi Mukuru, Umuyobozi w’Akarere Madamu Kayitesi Dative, ari kumwe n’uhagarariye Minisiteri y’Ubutabera, Bwana Mugabo Frank. Intego y’iki gikorwa yari ugukangurira abaturage gukemura amakimbirane mu bwumvikane batabanje kugana inkiko.

Mu ijambo rye, Umuyobozi w’Akarere Kayitesi yashimangiye akamaro k’inzego z’ubutabera zegerejwe abaturage zirimo Abunzi n’abayobozi b’inzego z’ibanze mu gufasha abaturage kubona ubutabera bwunga. Yasabye abaturage kwirinda amakimbirane adafite ishingiro, bagashyira imbere ibiganiro n’ubwumvikane mu miryango no mu baturanyi. Yagaragaje ko imanza akenshi zitwara amafaranga menshi zigateza ubukene, asaba abashakanye n’imiryango kubanza gukemurira ibibazo byabo mu rugo, byananirana bakagana incuti, abayobozi n’Abunzi. Yashimangiye ko nta terambere rishoboka mu gihe hakiri amakimbirane n’ubwumvikane buke.

Yakomeje asaba abaturage bifuza kujyana ibibazo byabo mu nkiko kubanza kugaragaza inyandiko zitangwa n’inzego z’ibanze zigaragaza ko habanje gukorwa inzira zose zo kubunga. Yongeyeho ko ibisubizo byiza kurushaho ari ibivuye mu muryango, n'ubwo inkiko nazo zigira uruhare mu gutanga ubutabera, ariko zikaba zitwara igihe n’amafaranga menshi.

Mu ijambo rye, uhagarariye Minisiteri y’Ubutabera, Bwana Mugabo Frank, yashimye Leta y’u Rwanda n’abafatanyabikorwa bayo ku guteza imbere uburyo bwo gukemura amakimbirane hatisunzwe inkiko, bugamije kwegereza abaturage ubutabera. Yagaragaje ko ubu buryo bufasha kugabanya umubare w’imanza mu nkiko, bikanateza imbere ubumwe n’amahoro arambye mu muryango nyarwanda. Yasabye abaturage kugirira icyizere inzego z’ubuhuza cyane cyane Abunzi, bafite ububasha bwemewe n’amategeko kandi bagira uruhare rukomeye mu gukemura amakimbirane menshi. Yasoje asaba abayobozi gukomeza gushyigikira no kuyobora abaturage mu gukemura ibibazo mu bwumvikane hagamijwe kubaka umuryango utekanye n’iterambere rirambye.