Umuyobozi w’Akarere ka Rutsiro, Madamu Kayitesi Dative, ari kumwe n'Umuyobozi w'Akarere Wungirije Ushinzwe Iterambere ry'Abaturage, yakiriye itsinda ry'abakozi b’umuryango “Raising the Village” riyobowe n’Umuyobozi wawo mu Gihugu, Bwana Jean Paulin Mutatsineza. Uyu muryango wibanda ku kuzamura imibereho y’abaturage binyuze mu bikorwa by’ubuhinzi, isuku n’isukura (WASH), kwizigamira, ndetse no guhindura imyumvire y'abaturage. Intego yo guhura kw'aba bayobozi kwari ukuganira kuri gahunda ziteganyijwe n'uyu muryango zigamije gufasha abaturage kwikura mu bukene binyuze mu nkingi enye z’ingenzi.

Mu rwego rw’ubuhinzi, uyu muryango uteganya gufasha abaturage bakorana na wo kubona imbuto zatoranyijwe ku buntu, ku bufatanye n’abagoronome b’Akarere, hagamijwe kongera umusaruro. Hazashyirwa imbaraga mu guhugura abahinzi kugira ngo bakoreshe uburyo bugezweho bwo guhinga no kongera umusaruro. Mu rwego rw'isuku n'isukura “WASH”, ibikorwa bizibanda ku kunoza uburyo bwo kubona amazi meza binyuze mu kubaka no gusana amariba y’amazi kugira ngo abaturage babone amazi atarenze metero 500, ndetse no gukangurira abaturage isuku n’isukura.

Iyi gahunda izatangira izakorerwa mu Mirenge itatu izatoranywa hashingiwe  ku bafite amakora make kurusha abandi. Hanateganyijwe guteza imbere ibimina by’amatsinda hagamijwe kongera uburyo bwo kwizigamira no kwiteza imbere. Abaturage bazasabwa kuzigama amafaranga akomoka ku musaruro w’ubuhinzi, ahwanye n’agaciro k’imbuto bahawe, azatangwa basaruye, hanyuma bakayashora mu mishinga ibyara inyungu ku rwego rw’amatsinda. 

Mu ijambo rye, Madamu Kayitesi yashimye ubu bufatanye, ashimangira ko ari ngombwa gushyira mu bikorwa ibikorwa byose hitabwa ku mihindagurikire y’ibihe kugira ngo birambe. Yanagaragaje ko amahugurwa agamije guhindura imyumvire afite uruhare rukomeye mu gufasha abaturage kwigira no kugera ku majyambere arambye mu mibereho myiza n’ubukungu.

Bwana Mutatsineza yijeje ko umuryango wa Raising village uzakora ibishoboka byose ibikorwa byateganyijwe bigakorwa mu buryo bukwiye bigamije kugera ku ntego. Uyu muryango usanzwe ufite ibikorwa byawo mu turere twa Ngororero na Nyabihu.