Uyu munsi tariki ya 15 Gashyantare 2026, mu Karere ka Rutsiro hakomeje amarushanwa y’Umurenge Kagame Cup hakinwa imikino ya nyuma ku rwego rw’Akarere mu bagore no mu bagabo. Imikino yabereye ku Kibuga cy’Umupira w’amaguru cya Bugabo giherereye mu Murenge wa Ruhango, aho n’Umuyobozi w’Akarere Madamu Kayitesi Dative yitabiriye iyi mikino.

Iri rushanwa rigamije guteza imbere imiyoborere myiza no kuzamura impano zitandukanye rikinwa hazirikanwa insanganyamatsiko igira iti:"Twimakaze ihame ry'imiyoborere myiza duharanira ko umuturage ahora ku isonga."

Abaturage baturutse mu mirenge ya Boneza, Murunda, Ruhango n’indi itandukanye bitabiriye kureba iyi mikino ku buryo ubushobozi bwa sitade bwabaye buto, abafana Babura aho bicara ku buryo hari n’abakurikiranye umupira babibarirwa n’abari ku kibuga kuri telefoni.

Mu bagore, ikipe y’Umurenge wa Rusebeya yakinnye n'Ikipe y’Umurenge wa Kivumu na ho mu bagabo, Ikipe y’Umurenge wa Boneza ikina n'iy’Umurenge wa Murunda. 

Umuyobozi w'Akarere Madamu Kayitesi Dative yatangije  imukino yombi ari kumwe n’Umuyobozi w’Akarere Wungirije Ushinzwe Iterambere ry’Ubukungu Bwana Uwizeyimana Emmanuel, Umyobozi w’Inkeragutabara mu Karere Lt. Col. Charles Rubyogo n’Umuhuzabikorwa w’Inama y’Igihugu y’Abagore Madamu Barayavuga Spéciose.

Ikpe y’Umurenge wa Rusebeya yahaye umwitangirizwa ikipe y’Umurenge wa Kivumu, iyiha isomo rya ruhago aho yayitsinze ibitego 7 ku busa. 

Mu mukino w’injyanamuntu wahuje ikipe y’Umurenge wa Boneza n’iy’Umurenge wa Murunda mu Bagabo, warangiye ikipe ya Boneza yegukanye intsinzi ku gitego 1 yabonye mu gice cya mbere cy’Umukino.

Aya makipe yombi akaba yahawe ibikombe ndetse akanahabwa amafaranga y’u Rwanda ibihumbi 300 ku makipe ya mbere. Mu gihe amakipe ya kabiri yahawe amafaranga y’u Rwanda ibihumbi 200 mu bagore no mu bagabo. Aya makipe kandi akaba agiye guhagararira Akarere aho amarushanwa agiye gukomeza ku rwego rw’Intara.

Madamu Kayitesi yashimiye amakipe yose yitabiriye irushanwa, abacampaka bakurikiranye imikino itandukanye n’abaturage bitabiriye muri rusange.

Iri rushanwa rikaba ryabaye umwanya mwiza wo gukangurira abaturage gahunda za Leta zitandukanye harimo kubakangurira kwita ku isuku, kurwanya imirire mibi, kurwanya ihohotera rishingiye ku gitsina, kwirinda inzoga z’inkorano zitujuje ubuziranenge , izindi gahunda zinyuranye.