Uyu munsi tariki ya 09 Ukuboza 2025, Umuyobozi w’Akarere ka Rutsiro, ari kumwe n’abagize Komite Nyobozi y’Akarere, yatangije imurikagurisha n’iserukiramuco ku nkombe z’ikiyaga cya Kivu mu Murenge wa Boneza. Iri murikagurisha n’iserukiramuco ryateguwe ku bufatanye na kompanyi ya Yirunga Ltd rizasozwa ku wa 15 Ukuboza 2025.

Iri serukiramuco ryahuje abahinzi, abacuruzi, abikorera n’abasura Akarere ka Rutsiro, rigamije kumenyekanisha ibyiza nyaburanga by’aka Karere, guteza imbere ishoramari no gufasha abaturage kwidagadura. Abitabiriye bahaboneye serivisi zitandukanye zirimo iz’ubukerarugendo, ubucuruzi, kumurika ibikorerwa mu Karere n’ibindi bikorwa byongera ubumenyi n’ubushobozi bw’abaturage.

Ibi birori byashojwe n’imyidagaduro itandukanye, harimo indirimbo n’imbyino ku bufatanye n’umuhanzi ukunzwe na benshi, Gisupusupu, watumye akanyamuneza kaba kose mu bitabiriye. Abaturage bo muri Boneza n’ahandi bitabiriye ku bwinshi bagaragaje ko bishimiye cyane iki gikorwa kibereye iwabo ku nshuro ya mbere, bavuga ko gitanga amahirwe mashya mu guteza imbere ubukungu n’imibereho myiza.

Akarere ka Rutsiro kavuga ko iri serukiramuco rizajya riba buri mwaka, rigafatwa nk’umwanya wo gukomeza kumurika ibyo bakora, gushyigikira abikorera no guha abaturage urubuga rwo kurushaho gukunda no kumenya ibyiza by’iwabo.

Madamu Kayitesi yashimye abafatanyabikorwa bagize uruhare mu gutuma iki gikorwa kigerwaho kandi ko kibaye irembo rikwiye ku ishoramari mu Karere n’indorerwamo y’ubukerarugendo mu Karere.