Umuyobzi w’Akarere Madamu Kayitesi Dative yasuye Umurenge wa Manihira agirana inama n’abaturage batandukanye bahagarariye abandi aho yabakanguriye kugira uruhare mu guhangana n'izamuka ry'ibiciro bongera umusaruro ukomoka ku buhinzi. Madamu Kayitesi yasabye abayobozi guharanira kugira umuturage utekanye.

Yagize ati: “muri iki gihe hari izamuka ry’ibiciro ry’ibikomoka kuri peteroli bigenda bituma n’ibiciro by’ibiribwa bizamuka. Ni ngombwa rero ko dukora ibishoboka tukazamura umusaruro ukomoka ku buhinzi tugamije kwihaza mu biribwa bikomoka iwacu,”

Abaturage bakaba biyemeje guhinga kinyamwuga bakoresheje  inyongera musaruro zirimo imbuto y’indobanure n’ifumbire ihagije ku buryo babona umusaruro uhagije ndetse bagasagurira amasoko kugira ngo bahangane n’izamuka ry’ibiciro by’ibiribwa ku masoko bihaza mu biribwa. Bijeje ko bagiye guhinga ubuso bwose bukwiye guhingwa ntabusigaye.

Madamu Kayitesi Dative yanakanguriye abaturage kwitabira gukoresha Sisitemu ya MBAZA ifasha abaturage n’abayobozi gutanga, gukurikirana no gukemura ibibazo by’abaturage mu nzira inoze.

Iyi sisitemu izazamura igipimo cyo gukorera mu mucyo, kurinda abaturage gutanga amakuru adahura ku bibazo byabo, gukurikirana no kumenya aho ikibazo cyatanzwe kigeze n’ibindi.

Sisitemu ya Mbaza buri Muturage wese yayikoresha yifashishije telefoni ye cyangwa akifashisha urubuga IREMBO.