Tariki ya 11 Kamena 2025, mu Murenge wa Mushubati, Akagari ka Cyarusera ku rwibutso rw'abazize Jenoside yakorewe Abatutsi habereye ijoro ryo kwibuka ku nshuro ya 31 Jenoside yakorewe Abatutsi mu 1994.

Iki gikorwa kitabiriwe n'Umuyobozi w'Akarere Wungirije ushinzwe iterambere ry'Ubukungu Bwana Uwizeyimana Emmanuel akaba n'Umushyitsi Mukuru, Umuyobozi w'Akarere Wungirije ushinzwe imibereho myiza y'abaturage Madamu Umuganwa Marie Chantal, Perezida wa Ibuka mu Karere, abahagarariye inzego z'umutekano ku rwego rw'Akarere n'abaturage b'Umurenge wa Mushubati, Akagari ka Cyarusera.

Bwana NIYONSENGA Phillippe, Umuyobozi wa IBUKA mu Karere, yagarutse ku gaciro k'ijoro ryo kwibuka nk'umwanya wo guha ihumure abarokotse Jenoside, kubakomeza, no kubafasha kwigirira icyizere. Ati: “ni uburyo bwo kubaha urubuga rwo kuvuga no gusangiza ubuhamya abandi kugira ngo abato batagira ngo ibivugwa ni amagambo. Ahubwo bakumva amateka afite ibihamya bifatika.” Yibukije abaturage ko kwitabira ijoro ryo kwibuka atari amahitamo y'umunyarwanda ko ahubwo ari inshingano dusangiye. Bwana NIYONSENGA yashimiye abagize uruhare mu kurokora Abatutsi bakarinda igihango cy'Ubunyarwanda.

Bwana Uwizeyimana Emmanuel yagize ati: “uyu mugoroba twibuka si umugoroba nk'iyindi. Ni umugoroba twongera kwibuka ababyeyi bacu, abana bacu, abavandimwe n'abaturanyi bacu, abamenyi, … bazize Jenoside yakorewe Abatutsi. Ni inshingano zacu gusigasira ubumwe n'ubudaheranwa by'Abanyarwanda twiyemeza ko Jenoside itazongera kubaho ukundi.” 

Bwana Uwizeyimana yashimiye kandi intwari z'Inkotanyi zitangiye Igihugu zigahagarika Jenoside ziyobowe n'Umugaba Mukuru Nyakubahwa Paul Kagame. Yashimiye abarokotse bemeye gutanga imbabazi ndetse bakaba baharanira kwiteza imbere badaheranywe n'agahinda.