Uyu munsi tariki ya 13 Gicurasi 2025, Akarere ka Rutsiro kakiriye itsinda riturutse  ku rwego rw'Intara riyobowe n’Umunyamabanga Nshingwabikorwa w'Intara y'Iburengerazuba Madamu Uwambajemariya Florence rije gusuzuma aho Akarere kageze kesa imihigo 2024-2025. Gusuzuma imihigo bikaba birakorwa hasuzumwa raporo y’Akarere ku mihigo no gusura aho ibikorwa biri mu mihigo biherereye.

Iri tsinda ryakiriwe n'Umuyobozi w'Akarere Wungirije ushinzwe iterambere ry’ubukungu Bwana Uwizeyimana Emmanuel ari kumwe n’Umuyobozi w’Akarere Wungirije Ushinzwe Imibereho myiza Madamu Umuganwa Marie Chantal, abakozi bakorera ku rwego rw'Akarere, abanyamabanga nshingwabikorwa b'imirenge, abahagarariye inzego z'abagore n'inzego z'urubyiruko, abahagarariye ihuriro ry’abafatanyabikorwa mu iterambere ry’Akarere, amadini n'abagize inama y'umutekano y'Akarere itaguye.

Bwana Uwizeyimana Emmanuel yagejeje ku bitabiriye iki gikorwa aho Akarere kageze gashyira mu bikorwa imihigo kihaye aho muri rusange imihigo y’Akarere igeze ku gipimo cya 92%.

Abagize itsinda ry’abagenzuzi bashimye imbaraga Akarere kashyize mu mihigo batanga inama zo gukomeza gukorera hamwe no kwibanda ku mihigo itararangira na yo ikarangira mu gihe gikwiye.

Bwana Uwizeyimana yasezeranyije ko Akarere kagiye gukomeza gushyira imbaraga mu kunoza raporo zitandukanye hubahirizwa ibiteganyijwe. Yasezeranyije ko Akarere kazakomeza guteza imbere ubufatanye bw'inzego zitandukanye mu kwesa imihigo.

Madamu Uwambajemariya yasabye abari mu nama gusobanukirwa neza ko ari inshingano za buri wese mu gutuma imihigo igenda neza: "… tugomba kureba ishyaka ryo gukunda Igihugu, kwitangira Igihugu, kugira ubutwari. Ni yo mpamvu duharanira twese kwesa imihigo."

Nyuma yo kuganira kuri raporo zatanzwe, abagize itsinda basuye imihigo iherereye mu mirenge ya Mushubati baherekejwe n’Abayobozi b’Akarere bungirije bombi, Gihango, Kigeyo na Kivumu. Ibikorwa byasuwe harimo ibiraro biri kubakwa, amaterasi y’indinganire ari gukorwa, inzu z’abatishoboye ziri kubakwa n’ibikorwa bitandukanye bigamije gukemura ibibazo bibangamiye imibereho myiza y’Abaturage (HIS).