Uyu munsi tariki ya 18 Ugushyingo 2025, Guverineri w’ Intara y’Iburengerazuba Bwana Ntibitura Jean Bosco ari kumwe n’abayobozi b’inzego z’umutekano mu Ntara yayoboye itsinda ry'Abakozi b'Intara mu gikorwa cyo gusuzuma imihigo y’Akarere ka Rutsiro 2025-2026 igihembwe cya I. Bwana Ntibitura yakiriwe n’Umuyobozi w'Akarere ka Rutsiro Madamu Kayitesi Dative ari kumwe n'abafatanyabikorwa n'abakozi b'Akarere batandukanye.

Guverineri Ntibitura yibukije ko imihigo itashyirwa mu bikorwa uko bikwiye hatabayeho ubufatanye bw'inzego zitandukanye.

Binyuze muri raporo rusange y’imihigo, Madamu Kayitesi yagaragarije Guverineri uburyo imihigo y'Akarere ihagaze muri rusange aho isaga 40 mu mihigo 125 y'Akarere yamaze kweswa ku kigero k'100%

Nyuma yo kuganira no kungurana ibitekerezo kuri iyi raporo, Guverineri ari kumwe n'abayobozi b'inzego z'umutekano ku rwego rw'intara n’abakozi bazanye, basuye bimwe mu bikorwa bikubiye mu mihigo y'Akarere 2025-2026 harimo umuhanda Shusho-Kariba wa Km 3,4, icyanya kigega gihenzeho ibigori n'inzu zubakirwa abasenyewe n'ibiza mu murenge wa Boneza. Aba bashyitsi baherekejwe n’Umuyobozi w’Akarere ari kumwe n’abakozi batandukanye b’Akarere.

Guverineri n’abagize itsinda bari kumwe batanze inama zitandukanye nyuma yo gusura ibi bikorwa aho basabye Akarere gushyiraho ingamba zo kwihutisha imihigo yagaragaye mu bukererwe no gukomeza gukurikirana iri gushyirwa mu bikorwa ko ikorwa uko bikwiye.