Tariki ya 17 na 18 Kanama 2024, Akarere ka Rutsiro kateguye urugendo rwo gusura inkengero za Pariki ya Gishwati-Mukura n’imisozi miremire yako. Uru rugendo rwateguwe ku bufatanye na koperative y’urubyiruko Ejo Heza isanzwe ikora ibikorwa bigamije guteza imbere ubukerarugendo mu karere n’Ikigo cy’Igihugu Gishinzwe Iterambere (RDB: Rwanda Development Board). Urugendo rwateguwe mu rwego rwo gushishikariza abakerarugendo gusura ibice bitandukanye by’Akarere ka Rutsiro by’umwihariko abagatuye n’Abanyarwanda.

Uru rugendo rwitabiriwe n’abantu b’ingeri zitandukanye harimo Umuyobozi w’Akarere ka Rutsiro Madamu Kayitesi Dative, Umuyobozi w’Akarere Wungirije ushinzwe iterambere ry’ubukungu Bwana Uwizeyimana Emmanuel, abakozi b’Akarere ka Rutsiro bakorera ku rwego rw’Akarere, abakerarugendo baturutse mu gihugu cya Nigeria, abayobozi ba Koperative Ejo Heza n’abandi.

Uru rugendo rwakorewe mu nzira y'abanyamaguru ku nkengero za Pariki ya Gishwati Mukura. Umunsi wa 1, abitabirye urugendo bahagurukiye ku biro bya Pariki ya Gishwati-Mukura mu murenge wa Kigeyo mu Kagari ka Nyaghinika, bakomeza berekeza mu murenge wa Ruhango banyuze ku nkengero za Pariki, baca mu nzuri za Gishwati baruhukira mu murenge wa Ruhango mu Kagari ka Gihira nyuma y’urugendo rwa Km hafi 16.

Ku munsi wa 2, hakozwe urugendo rwa Km zigera kuri 3 harebwa ibyiza nyaburanga bitandukanye harimo imbyino gakondo, imikino n'ibindi bishingiye ku muco nyarwanda. Muri rusange, hakozwe urugendo ruganda na Km 18,5.