Uyu munsi tariki ya 26 Nzeri 2019 mu karere ka Rutsiro hateraniye inama mpuzabikorwa y'ubumwe n'ubwiyunge igamije kurebera hamwe uko ubumwe n'ubwiyunge bihagaze mu karere ka Rutsiro, kuganira ku myiteguro y'ukwezi k'ubumwe n'ubwiyunge no kwibukiranya abagize ihuriro ry'ubumwe n'ubwiyunge kuri buri rwego kuva ku kagari kugera ku rwego rw'igihugu iyobowe na Kamana Jean Marie, Umunyamabanga Nshingwabikorwa w'agateganyo w'akarere ka Rutsiro.

Umushyitsi mukuru muri iyi nama yari Hon. Renzaho Johovanny watangiye mu ijambo rye yibutsa abitabiriye inama ko ubumwe n'ubwiyunge ari yo soko n'umusingi w'iterambere igihugu kigomba kubakiraho bityo asaba buri wese kugira uruhare ku buryo buhoraho mu kubaka ubumwe n'ubwiyunge by'abanyarwanda.

Hon. Jehovanny yatangarije abitabiriye inama ko ukwezi k'ubumwe n'ubwiyunge kuzatangizwa ku ya 1 Ukwakira 2019 hanatangizwa ihuriro ry'ubumwe n'ubwiyunge ku rwego rw'umudugudu.

Nk'uko yakomeje abigaragaza mu ngengabihe, hakaba hateganyijwe gukorwa ibikorwa binyuranye muri uku kwezi harimo ibiganiro mpaka k'ubumwe n'ubwiyunge, gusura abagororwa mu magereza atandukanye, gushimira imirenge yahize iyindi, kuba hafi imiryango yagizweho ingaruka na Jenoside yakorewe abatutsi mu 1994, gutoranya site nibura 4 aho abayobozi bakuru bazaza kwifatanya n'abaturage mu bikorwa by'ubumwe n'ubwiyunge, gutangiza ihuriro ry'ubumwe n'ubwiyunge ku rwego rw'umudugudu, ibiganiro ku nzego zinyuranye, ibitaramo mu mashuri n'amarushwana ku bumwe n'ubwiyunge .

Mu bitabiriye iyi nama, harimo abagize biro y'inama njyanama ku karere, inama y'umutekano itaguye mu akarere, abanyamabanga nshingwabikorwa n'abashinzwe uburezi mu mirenge, abayobozi b'ibigo by'amashuri, n'abahagarariye amadini.

Ukeneye amakuru arambuye ku bumwe n'ubwiyunge, kanda hano.