Akarere ka Rutsiro ni Akarere kaberanye n'ubukerarugendo kubera ubwiza nyaburanga kihariye harimo imisozi miremire, ikiyaga cya Kivu n'ibirwa bikirimo, Pariki ya Gishwati Mukura n'ibihingwa binyuranye nk'icyayi n'ikawa.

Abaturage bo bahinga urutoki, ibishyimbo, inanasi, ibigori, ibijumba, ibirayi, ingano, ibisheke n'ibindi. 

Mu gihe kirekire cyatambutse, aba baturage bagorwaga no kugeza umusaruro wabo ku masoko aho umwinshi wangirikiraga mu mirima ndetse undi ugata agaciro wakabaye winjiriza abaturage.

Kubera imiyoborere myiza, Leta yumvise iki kibazo ikigira icyayo ihitamo gukorera abaturage imihanda ibafasha kugeza umusaruro wabo ku isoko bityo iterambere ryabo rikihuta.

Muri urwo rwego, mu Karere ka Rutsiro hgombaga kubakwa imihinda 3 ariyo 1. gakeri-bitenga-mungoti, 2. terimbere-mujebeshi-ku rutindo rwa mujebeshi, 3. Mushubati-Sure-ruhingo-koko-musasa-nkomero-boneza-nkora.

Kubera ko iyi yarangiye, hasigaye umuhanda wa 3 ari nawo turi kuvuga ho aho imirimo yo kuwubaka igeze kuri 44% ukaba ufite uburebure bwa kilometero 41.5 Km.

Uyu muhanda uzuzura utwaye akayabo kari hejuru ya miliyari 18 z'amafaranga y'uRwanda.

Abaturage barishimira imiyoborere myiza ya Leta izirikana abaturage ikabagezaho ibikorwaremezo bibafasha kwiteza imbere. Uyu muhanda uzakura aba baturage mu bwigunge cyane ko uzaba urimo kaburimbo, ugateza imbere ubukerarugendo n’ubwikorezi muri rusange. Uzongera isuku mu karere ugabanye ikibazo cy’icyondo n’ubunyereri by’igihe cy’imvura.

Ku bazi neza Akarere ka Rutsiro, kubera uyu muhanda, ubu wava ahitwa kuri Fuwaye ya Mushubati ukagera Ruhingo ya Gihango nta kibazo. Ukongera kandi ukava mu Nkomero ugera Musasa-Gabiro cyangwa Boneza nta komyi.

Kugira ngo aho hose uhanyure, haracyabura ikiraro kizubakwa ku mugezi wa Koko kitarakorwa. Mu gushaka ibisubizo, ubuyobozi bwafashe umwanzuro ko hubakwa ikiraro cy'agateganyo abagenzi bagatangira kuwukoresha.

Uyu muhanda uzubakwaho ibiraro 3 by'ingenzi ari byo Koko, Rugamba na Nkora. Uyu muhanda uzahuza n'icyambu giteganyijwe kubakwa mu murenge wa Kigeyo muri santere ya Nkora.