Uyu munsi tariki ya 26 Gicurasi 2023, ku biro bya RW 0901 CMUI Gihango uterwa inkunga na Compassion International habereye Inama nyunguranabitekerezo yari igamije kugaragarizwamo iteganyabikorwa ry'imyaka 3 ishize hamwe n'iry'imyaka 3 itaha.

Iyi nama yatangijwe inayoborwa n'Umunyamabanga Nshingwabikorwa w'Umurenge wa Gihango Madamu Icyizihiza Alda ari kumwe n'Umushumba wa Paruwasi ya Communauté Methodiste Unie Internationale Rev. Pasteur HITIMANA Dominique.

Iyi nama yitabiriwe na bamwe mu banyamabanga nshingwabikorwa b'utugari n'abakuru b'imidugudu abagenerwabikorwa ba Compassion babarizwamo.

Abitabiriye inama bakaba bishimye ibikorwa byakozwe mu iteganyabikorwa ryari riteganyijwe mu gihe cy'imyaka 3 ishize; ni ukuvuga guhera mu mwaka wa 2020.

Mu byagezweho, harimo abaturage 2 bubakiwe inzu mu gihe abandi 2 basanuriwe inzu. Imiryango itandukanye yorojwe amatungo harimo 50 yorojwe ingurube, imiryango 248 yorojwe ihene n'indi 16 yahawe inka.

Uretse kandi ubufasha bwahawe imiryango itishoboye kurusha iyindi, abana 249 bafashijwe mu buryo compassion isanzwe ifashamo abana harimo imyigire yabo no mu mibereho yabo aho umwana afashwa kubona ibikoresho by'ishuri byose, amafaranga y'ishuri n'imyambaro isanzwe kuva ku nkweto kugera ku mupira w'imbeho.

Compassion kandi itanga amahugurwa ku babyeyi mu kurinda abana ihohoterwa buri mwaka aho ababyeyi basinya amasezerano mpuzamahanga yo kurengera umwana. 
Ababyeyi bashishikarizwa kwibumbira mu matsinda yo kwizigama no gukora imishinga ibateza imbere aho binyuze mu matsinda 10 y'ababyeyi babashije kwizigama amafaranga y'URwanda miliyoni ebyiri n'ibihumbi magana inani na mirongo itanu na birindwi na magana atandatu na mirongo ine (Amfr  2, 857, 640). Kugeza ubu, Aya matsinda afite imitungo ibarirwa agaciro kangana na miliyoni cumi n'imwe n'ibihumbi magana ane na mirongo itatu na bitanu na magana abiri (Amfr 11, 435, 200).

Mu iteganyabikorwa rishya rizarangira mu mwaka 2026, umushinga RW 0901CMUI ukazakomeza ushyira mu bikorwa bisa n'ibyimyaka ishize ariko uzaguriramo ibikorwa bijyanye no guteza imbere impano z'abana mu mikino, ubugeni n'ubukorikori.

Compassion  International ikaba ifasha abana ku ntego igira iti: "tubature umwana ku ngoyi y'ubukene mu izina rya Yesu". Igashingira ku mahame 4 ari yo kuzamura umwana mu bumenyi n'ubukungu, Imibanire n'abandi, Imikurire y'umubiri n'Iterambere mu by'umwuka.

Pastor Dominique akaba yashimiye ababyeyi bagaragaza ubunyangamugayo mu gukoresha neza inkunga babona bikomotse ku mu muryango compassion international abasaba gukomeza guharanira kwiteza imbere.

Ubuyobozi bwashikiye Compassion International binyuze mu mushinga RW 0901CMUI bwizeza ubufatanye mu kugenzura ko inkunga abagenerwabikorwa bahabwa ikoreshwa neza no gufatanya mu guhindura imyumvire y'abayihabwa.