Kuri uyu wa Gatatu tariki ya 16 Kanama 2022, kuri hoteli Ibigabiro ishami rya Rutsiro hateraniye inama rusange y'Inama y'Igihugu y'Abagore yagarutse ku nsanganyamatsiko igira iti: "twubake umuryango ushoboye kandi utekanye!"

Iyi Inama yatangijwe na Dative Kayitesi, Umuhuzabikorwa w’Inama y’Igihugu y’Abagore mu Ntara ya y’Uburengerazuba yitabirwa n’abagize biro y’Inama y’Igihugu y’Abagore ku rwego rw’Imirenge n’urw’Akarere.

Muri iyi nama hagarutswe ku mihigo ya Mutimawurugo yo mu mwaka wa 2022/2023 yeshejwe ku buryo bushimishije hanasinywa imihigo mishya ya Mutimawurugo mu mwaka wa 2023/2024 ku rwego rw'Akarere no ku rwego rw'imirenge.

Umuhuzabikorwa w’Inama y’Igihugu y’Abagore mu karere ka Rutsiro Madamu Mukarusanga Florence yagaragarije abitabiriye inama uburyo besheje imihigo ya Mutimawurugo bikabahesha umwanya wa 1 mu Ntara y'Uburengerazuba. Yagarutse kandi ku mihigo mishya abagore biteguye kwesa uyu mwaka 2023/2024 harimo no guhangana n'ikibazo cy'imirire mibi n'igwingira, amakimbirane yo mu muryango, n'ibindi.

Umuyobozi w’Agateganyo w’Akarere ka Rutsiro, Bwana Mulindwa Prosper, yashimiye ba Mutimawurugo ishema bahesheje Akarere anabasaba gukomeza gushyira imbaraga mu gukemura ibibazo bibangamiye umibereho y’abaturage cyane cyane amakimbirane yo mu ngo. Bwana Mulinda yasabye kandi kugira uruhare mu gukangurira abaturage gutanga umusanzu w’ubwisungane mu kwivuza no kubasobanurira akamaro ko kuba mu bwisungane mu kwivuza.

Abitabiriye inama bamaze gusobanurirwa imihigo ya ba Mutimawurugo izakorerwa mu midugudu yose igize Akarere 483, hakurikiyeho igikorwa cyo kuyishyiraho imikono. Umuyobozi w’Agateganyo w’Akarere, Bwana Mulindwa Prosper, yasinyanye n’Umuhuzabikorwa w’Agateganyo w’Inama y’Igihugu y’Abagore Madamu Mukarusanga Florence ku rwego rw’Akarere. Ku rwego rw’Umurenge, Umunyamabanga Nshingwabikorwa yasinyanye n’Umuhuzabikorwa w’Inama y’Igihugu ku murenge.

Ba Mutimawurugo bakaba basabye ubufatanye bw’abanyamabanga nshingwabikorwa kugira ngo iyi mihigo  izagerweho 100% kandi mu gihe gikwiye.

Bwana Mulindwa yijeje ba Mutimawurugo ko ubuyobozi buzababa hafi bukabatera ingabo mu bitugu uko bikenewe kose.