Muri gahunda y’Igihugu yo kwegereza abaturage ubuyobozi no kubafasha gukemura ibibazo badacurigiye mu ngendo, hashyizweho gahunda y’inteko y’abaturage ngarukacyumweru.

Mu karere ka Rutsiro iyi gahunda iba buri wa Kabiri ku gicamunsi uhereye i saa munani. Abaturage bateranira ku rwego rw’Akagari bakaganira kuri gahunda za Leta zitandukanye, hakakirwa hanakemurwa ibibazo by’abaturage. Inteko y’abaturage igira aho ibera ku  rwego rw’Akarere ari na ho abayobobozi baturutse ku rwego rw’Akarere bifatanya n’abaturage mu nteko.

Ni muri urwo rwego, Umuyobozi w'Akarere Madamu Kayitesi Dative ari kumwe n'Umuyobozi wa Polisi mu karere yifatanyije n’abaturage mu nteko yabereye mu murenge wa Murunda Akagari ka Kirwa mu Mudugudu wa Satinsyi.

Muri iyi nteko haganiriwe kuri gahunda za Leta zitandukanye harimo kunoza imyiteguro y'amatora, kwitabira gufata indangamuntu, gukumira amakimbirane yo mu ngo, kwirinda ubucukuzi bunyuranyije n’amategeko no kwakira no gukemura ibibazo by'abaturage.

Ku bijyanye n’amatora, Madamu Kayitesi yibukije abaturage ko gutora ari uburenganzira bw’umuturage wese wujuje ibisabwa. Mu bisabwa harimo kuba warikoshoje kuri lisiti y’itora ukamenya aho uzatorera no kuba ufite indangamuntu. Ushaka kwikosoza kuri lisiti, ashobora kwifashisha telefoni ngendanwa akandika *169# hanyuma akemeza; agakurikiza amabwiriza.

Abaturage basabwe kugira uruhare mu gukumira amakimbirane yo mu ngo bagatanga amakuru ku miryango babona itabanye neza kugira ngo yigishwe hakiri kare hirindwa ko umwe yagirira nabi undi. Ababyeyi kandi basabwe guharanira ko imiryango yabo ibana neza bagafasha abana babo kubona uburere bukwiye.

Ku bijyanye n’ubucukuzi butemewe, Umuyobozi wa Polisi mu Karere, Sspt Butere Paul, yibukije ababikora ko ari icyaha gihanwa n’amategeko usibye no kuba ari ukwangiza ibidukikije. Yagaragaje ingaruka zivamo harimo no kuba ubukora yatakaza ubuzima mu gihe igisimu cyaba kimugwiriye akabura ubufasha ubwo ari bwo bwose. Yasabye abijandika mu bucukuzi butemewe kubireka bataragerwaho n’ingaruka.

Nyuma yo kuganira, Madamu Kayitesi yakiriye, akemura kandi atanga inama ku bibazo by’abaturage.

Muri iyi gahunda, Umuyobozi w'Akarere Wungirije Ushinzwe Iterambere ry'Ubukungu Bwana Uwizeyimana Emmanuel yifatanyije n'abaturage bo mu Kagari ka Muyira mu murenge wa Manihira mu gihe Umuyobozi w'Akarere Wungirije Ushinzwe Imibereho Myiza y'Abaturage Madamu Umuganwa Marie Chantal yifatanyije n'abaturage bo mu Kagari ka Murambi mu murenge wa Musasa.