None ku wa Gatanu tariki ya 20 Nzeri 2024, Umuyobozi w’Akarere Wungirije Ushinzwe Imibereho myiza y’Abaturage Madamu Umuganwa Marie Chantal ari kumwe n’abakozi b’Ikigo cy’Igihugu Gishinzwe Igororamuco (NRS)  yifatanyije n’Imboni z’impinduka mu muganda udasanzwe wo kubakira utishoboye. Uyu muganda wabereye mu murenge wa Kivumu aho abayobozi n’Imboni z’impinduka bubakiye Madamu Nahimana Solange umutuye mu mudugudu wa Rwinyoni Akagari ka Nganzo inzu yo kubamo ihomwa ibishahuro. Uyu muganda wanitabiriwe n’urubyiruko rw’abakorerabushake.

Imboni z’impinduka ni abaturage batandukanye baba baragororewe mu bigo ngororamuco bitandakanye.

Ngwije Jean Népomuscène ni we wari uyoboye abakozi ba NRS akaba ari Umuyobozi w’Ishami rishinzwe gusubiza mu buzima busanzwe abavuye mu bigo ngororamuco.

Uyu muganda wakozwe muri gahunda NRS irimo yo kugenzura ibikorwa bitandukanye ifatanyamo n’uturere mu rwego rwo gusubiza mu buzima busanzwe abavuye mu bigo ngororamuco no kubafasha kwiteza  imbere.

Aganira n’imboni z’impinduka n’urubyiruko rw’abakorerabushake nyuma y’umuganda , Madamu Umuganwa yasabye urubyiruko kwirinda ingeso mbi cyane cyane ibiyobyabwenge abibutsako ari bo bajyerwaho n’ingaruka mbere na mbere. Yagize ati: “ n'ubwo kunywa ibiyobyabwenge bihombya Igihugu, bigahombya Akarere, umuntu wa mbere ugirwaho ingaruka no kunywa ibiyobyabwenge ni ubinywa nyir'ubwite.”

Madamu Umuganwa yasabye abanyuze mu bigo ngororamuco kugira uruhare mu kubaka Igihugu bakagaragariza umuryango ko bahindutse. Yabasabye kandi kutararikira ibihenze ngo babishake mu nzira mbi. Yabasabye kugisha inama no gukora cyane bagaharanira kugera ku cyo bifuza mu nzira zikwiye kandi mu gihe nyacyo.

Umuyobozi yashimiye urubyiruko rw’abakorerabushake (youth volunteers) abizeza ko ubuyobozi buhari ngo bufatanye na bo mu kugira ubuzima bwiza no kubaka u Rwanda twifuza.

Ngwije Jean Népomuscène yashimiye abaturage bakiriye imboni z’impinduka bakemera kubafasha ngo bahindure imibereho yabo. NRS, Akarere n'abandi bishimira ko hari abanyuze mu bigo ngororamuco biteza imbere. Yabasabye gukomeza kubafasha kwiteza imbere banabagira inama ku kunoza imyatwarire  yabo.

Imboni z'impinduka zafashijwe kwinjira muri koperative zitandukanye mu rwego rwo kwiteza imbere.

Abakorerabushake basabwe gukomeza kugira uruhare mu gufasha bagenzi babo baba bavuye mu bigo ngororamuco bagatanga amakuru ku bo babona batangiye gusubira mu ngeso mbi.

Imboni z'impinduka zibukijwe kuzirikana amahirwe Igihugu gitanga harimo kubona inguzanyo byoroheje kandi zitaremerera uwazifashe kwishyura.

Bwana Ngwije yagaragaje ko igitera ibyaha n'amakosa harimo ubukene. Ati: “tugomba gukoresha amahirwe yose dufite mu kurwanya ubukene.”

Nyuma, abayobozi bakomereje ibikorwa mu gakiriro ka Rutsiro mu Murenge wa Mushubati aho basuye Koperative y'imboni z'impinduka ikora umwuga w'ububaji no kudoda ibikapu mu rwego rwo kureba uburyo bakoresha inkunga bahawe mu kwiteza imbere. Abayobozi basabye abagize koperative gucunga neza umutungo bagezeho bakawubyaza umusaruro ukwiye.