Uyu munsi tariki ya 15 Gashyantare 2022  mu cyumba cy’inama cy’Akarere ka Rutsiro hari kubera umuhango w’iherekanya bubasha hagati y’Umunyamabanga Nshingwabikorwa w’Akarere Bwana Mutembe Tom n’Umunyamabanga mushya Bwana Bagirishya Pierre Claver. Ihererekanya bubasha kandi riranaba hagati y’Umunyamabanga nshingwabikorwa w’Akarere ka Rutsiro n’Umuyobozi w’Imirimo rusange Bwana Kamana Jean Marie.

Bwana Mutembe akaba yoherejwe gukomereza inshingano z’umunyamabanga  mu karere ka Ngoma mu ntara y’Iburasirazuba naho Bwana Bagirishya waje mu karere ka Rutsiro akaba yakoreraga inshingano z’umunyamabanga mu karere ka Musanze. Bwana Kamana we akaba yoherejwe mu Ntara y’Amajyepfo mu karere ka Ruhango kuhakomereza inshingano z’Umuyobozi w’Imirimo Rusange.

Umuhango wayobowe n’Umuyobozi w’Akarere ka Rutsiro Madamu Triphose MUREKATETE witabiriwe na Visi Perezida w’Inama Njyanama y’Akarere ka Rutsiro, abakozi bakorera ku rwego rw’Akarere ka Rutsiro, abanyamabanga Nshingwabikorwa b’imirenge bose n’abagize inama y’umutekano y’akarere itaguye.

Mu ijambo rye, Madamu Murekatete yashimiye Umunyamabanga Nshingwabikorwa n’Umuyobozi w’Imirimo rusange bagiye ku mirimo bakoze n’uruhare bagize mu iterambere ry’Akarere ka Rutsiro abifuriza kuzakomeza inshingano zabo neza kandi bakorana n’abo basanze neza. Ati: “Gukorana neza n’abo mukorana ni iby’agaciro. Ntawumenya aho ahurira n’umuntu muri iyi si!”

Abagiye nabo bakaba bashimiye abakozi bakoranye babasezeranya kuzahora babazirikana cyane ko akazi kabagize abavandimwe.

Bwana Kamana ati: “byari iby’agaciro gukorana namw. Rutsiro nayigiyemo byinshi kandi nabonyemo inshingano nyinshi. Twakoranye neza, ndagira ngo mbashimire mbikuye ku mutima. Mukomeze kugira imirimo myiza muteza imbere akarere n’igihugu muri rusange.”

Mu guhererekanya ububasha, Bwana Mutembe yagaragarije Bwana Bagirishya amakuru y’ibanze ajyanye n’Akarere ka Rutsiro harimo umubare w’abakozi b’akarere: abarimu, abaganga n’abakozi bo mu nzego z’ibanze, imishinga migari iri mu karere n’amasoko atandukanye ateganyijwe mu karere hamwe n’ayamaze gutangwa.

Bwana Mutembe yakomeje ashimira abakozi bakoranye mu gihe kiri hafi imyaka 2 yari amaze ari Umunyamabanga Nshingwabikorwa w’Akarere ka Rutsiro.

Bwana Bagirishya yijeje abakozi b’akarere ka Rutsiro ubufatanye mu iterambere ry’akarere. Yanashimiye abakozi ku ntera akarere ka rutsiro kamaze kugeraho babigizemo uruhare abasaba gukomeza gusenyera umugozi umwe bakongera intambwe ifatika ku iterambere ry’akarere.

Mugwaneza Gloria Nadine, Visi Perezida w’Inama Njyanama, yashimiye abakozi bimutse aha ikaze Umunyamabanga mushya anamusaba kuzasigasira ubufatanye hagati y’abakozi b’akarere.