Uyu munsi tariki ya 14 Werurwe 2024, kuri Hotel Ibigabiro ishami rya Rutsiro habereye inama mpuzabikorwa y'Akarere ka Rutsiro. Inama yayobowe n'Umuyobozi w'Akarere Madamu Kayitesi Dative ari kumwe n'Umunyamabanga Nshingwabikorwa w'Intara y'Uburengerazuba Madamu Uwambajemariya Florence ari na we wari umushyitsi Mukuru.

Inama mpuzabikorwa yitabirwa n'abayobozi barimo abakuru b'imidugudu, abanyamabanga nshingwabikorwa b'utugari, ab'imirenge, abayobozi b'amashami mu karere, n'abagize inama y'umutekano itaguye y'Akarere; igaterana inshuro 2 mu mwaka. Kuri iyi nshuro, iyi nama ikaba yitabiriwe n’abayobozi barenga 500 harimo n’abafatanyabikorwa bagize uruhare mu gufasha abaturage b’Akarere kubona umusanzu w’ubwisungane mu kwivuza.

Muri iyi nama, haganiriwe ku mutekano, uruhare rwa serivisi nziza mu iterambere, imihigo y'ubukangurambaga harimo na Mituweli, imyiteguro y'amatora y'umukuru w'Igihugu n'abadepite ndetse hanasozwa umwaka wo gutanga umusanzu w’ubwisungane mu kwivuza 2023-2024 hanatangizwa umushya wa 2024-2025.

Madamu Kayitesi yashimiye abayozi ku ruhare bagize mu gufasha abaturage kumva no gusobanukirwa akamaro ko gutanga ubwisungane mu kwivuza aho abaturage babashije gutanga umusanzu ku ijanisha rya 91%. Imirenge yashimiwe uburyo yakoze ibishoboka ariko na none imirenge yagiye biguru ntege isabwa gushyiramo imbaraga.

Sspt Butera John, umuyobozi wa polisi mu karere watanze ikiganiro ku mutekano, yibukije abayobozi ko igihugu gikomeye ku mutekano kandi ko U Rwanda rutewe ishema no kuba rwuje Umutekano ku bufatanye bw'abayobozi n'inzego z'umutekano asaba abayobozi gukomerezaho. Ati: "ntihagire ikiturangaza ahubwo twese tujye imbere turangajwe imbere na Nyakubahwa Perezida wa Repubulika. Tugire uruhare mu gufasha abaturage kwicungira umutekano tubashishikariza gukora amarondo."

Umuyobozi w'Akarere Wungirije Ushinzwe Iterambere ry'Ubukungu Bwana Uwizeyimana Emmanuel yagarutse ku ruhare rwa serivisi nziza mu iterambere ry’Akarere asaba abayobozi gutanga serivisi nziza no kurangwa n’imyitwarire ikwiye umuyobozi. Ati: "gutanga serivisi nziza ntibisaba amasomo; ntibisaba amashuri. Gutanga serivisi nziza biva mu mutima. Tugire umuco wo kudacuragiza abaturage. Serivisi nziza ni inkingi ya mwamba y'iterambere ryihuse."

Bwana Semiruho Habibu, Umuhuzabikorwa wa Komisiyo y'amatora mu karere, yasobanuriye abitabiriye inama uko amatora y'umukuru w'Igihugu n'abadepite azagenda n'ibisabwa kugira ngo amatora azakorwe neza.

Umuyobozi w'Akarere Wungirije Ushinzwe Imibereho Myiza y'Abaturage Madamu Umuganwa Marie Chantal yagarutse ku bikorwa bisaba ubukangurambaga asaba abayobozi kongera imbaraga muri ibi bikorwa. Ibi bikorwa birimo gutanga umusanzu w'ubwisungane mu kwivuza, gukemura ibibazo bibangamiye Imibereho myiza y'abaturage, umuganda n'ibindi. Ati "twongere imbaraga mu bikorwa bisaba ubukangurambaga kandi dufatanyije tuzesa imihigo. Tugire umutima wo kwita ku baturage dushinzwe kureberera."

Madamu Umuganwa yakomeje agaragaza uko imidugudu, utugari n'imirenge byesheje umuhigo wo gutanga umusanzu w’ubwisungane mu kwivuza “Mituweli” aho hahembwe imidugudu 62, akagari 1 ka Rugeyo mu murenge wa Murunda kubera kwesa umuhigo 100% n'umurenge wa Nyabirasi uhemberwa guhiga iyindi mu kwesa umuhigo wa Mituweli.

Madamu Uwambajemariya yibukije abayobozi ko kuba Umuyobozi atari igitangaza ahubwo ari amahirwe. Ati: "ntabwo ari igitangaza kuba uri umuyobozi ahubwo ni amahirwe. Aya mahirwe rero tugomba kuyabyaza umusaruro  tuba abashumba beza bazirikana ko nta ntama yazimira bayishinzwe. Dukwiye gufasha abaturage tubikuye ku mutima. Twegere imiryango tugerageze gukemura no gukumira amakimbirane ari mu muryango." Madamu Uwambajemariya yakomeje yibutsa abayobozi uruhare rwabo mu gutegura imigendekere yiza y'amatora harimo no gufasha abaturage bose bujuje ibisabwa kubona indangamuntu kubera ko utayifite atabasha gutora.