Uyu munsi tariki ya 20 Mata 2023, mu cyumba cy’inama cy’Akarere ka Rutsiro habereye inama igamije ubukangurambaga ku bukorerabushake n’ubuwitange yahuje ibyiciro by’urubyiruko binyuranye baturutse mu mirenge 13 igize Akarere.

Iyi nama yayobowe n’Umuyobozi w’Akarere ka Rutsiro Madamu Murekatete Triphose ari kumwe na Bwana Kabanda Rusangiza Jean Marie Vianney intumwa ya Minisiteri y’Ubutegetsi bw’Igihugu (MINALOC) ifite guhuza ibikorwa by’ubukorerabushake mu nshingano muri MINALOC na ACP Emmanuel Karasi ushinzwe ubugenzuzi  muri Polisi y’u Rwanda.

Muri iyi nama, hagaragajwe ibikorwa bitandukanye urubyiruko rw’abakorerabushake rwakoze mu bihe bitandukanye harimo gufasha Leta mu bukangurambaga butandukanye harimo kurwwanya imirire mibi hubakwa imirima y’igikoni, kwishyurira abaturage batishoboye amafaranga y’ubwisungane mu kwivuza, kubakira abatishoboye ubwiherero n’ibindi.

Urubyiruko rwitabiriye rwasabwe gukomeza kurangwa n’indangagaciro zitandukanye harimo gukunda Igihugu, gusigasira ibyagezweho, ubwitange, ubukorerabushake, ikinyabupfura n’izindi zifitiye igihugu akamaro.

ACP Emmanuel yasabye urubyiruko kugira uruhare mu gukumira ibyaha bibera aho dutuye batangira amakuru ku gihe mu rwego rwo gukumira icyaha kitaraba. Mu byaha byagarutsweho, hibanzwe ku bangavu bakorerwa ihohoterwa rishingiye ku gitsina rimwe na rimwe bagaterwa inda cyangwa se indwara zandurira mu mibonano mpuzabitsina.

Madamu Murekatete yasabye urubyiruko kugera ikirenge mu cy’intwari zaharaniye kubohara u Rwanda, aho zaharaniye kurubaho mu mahoro zikarwana urugamba zidategereje ibihembo. Asoza inama, yasabye urubyiruko rw’abakorerabushake gushishikariza urundi rubyiruko kugira umutima wo kwitanga na bo bahiga ko bagiye gukora uko bashoboye urubyiruko rwiteguye gutanga umusanzu warwo ku bushake no mu bwitange ukazamuka ukava ku bihumbi bisaga 15 bibarirwa mu karere ukagera bihumbi bisaga  74 mu gihe cya vuba.