Muri iki gitondo, kuri iki cyumweru cyo ku wa  19/12/2021, Umuyobozi w’Akarere ka Rutsiro Madamu Murakatete Triphose yazindukiye mu bukangurambaga bwo kwirinda no kurwanya Covid-19 mu murenge wa Kivumu kuri Paroisse Gatolika ya Kivumu. 

Madamu Murekatete yaganiriye n’imbaga y’abakirisitu ku cyorezo cya Covid-19 cyugarije isi abibutsa ko kigihari kandi ko gishobora gushyira ubuzima bwabo mu kaga ndetse kikaba cyatwara n’ubuzima bw’abaturage mu gihe hadafashwe ingamba nyazo kandi zihamye.

Mu ngamba zashyizweho, Madamu Murekatete yibukije abaturage ko bakwiye kubahiriza intera nibura ya metero 1 hagati y’umuntu n’undi, gukaraba intoki kenshi ariko ikiruta byose umuntu agafata urukingo kuko ari rwo nzira yizewe cyane kurusha izindi mu kwrinda kwandura Covid-19 no kuba utazahazwa na yo mu gihe ugize ibyago byo kwandura.  Yashikarrije abatarikingiza gufata urukingo ndetse nabamaze kurufata bakabishishikariza abandi ku buryo buri muturage wese aba yamaze kwikingiza vuba bishoka.

Yagize ati: urukingo ni rwo nzira yizewe yatuma abaturage b’Akarere ka Rutsiro n’abanyarwanda muri Rusange dusubira mu buzima busanzwe. Ni rwo rwaturinda ingaruka zo gusubira kuguma mu rugo mu gihe twese twaba twaramaze gukingirwa kuko tuba twizeye umutekano w’ubuzima bwacu. Twitabire gufata urukingo kuko urukingo ni ubuzima.”

Nyuma yo kuganiriza abakirisitu, Madamu Murekatete yakomereje ubukangurambaga mu kagari ka Bunyunju aho yagiranye inama n’abayobozi b’inzego zitandukanye kuva ku mudugudu kugera ku murenge. Madamu Murekatete yabasabye gukorera ku ntego no ku muhigo wo gukumira burundu icyorezo cya Covid-19 abaturage bikingiza ku buryo bwuzuye.

Yagize ati: ”intego yacu ni 1. Kugira umuturage utekanye kandi ubayeho neza. Twiyemeze guhindura Umurenge wa Kivumu tuwugira neza. Buri wese arasabwa kumva ko kwesa imihigo bimureba ndetse akiyemeza guhora ku isonga mu rugamba rw'iterambere cyane mu guhangana na Covid-19.”

Inama yasojwe abayobozi biyemeje ko bagiye gukora iyo bwabaga abaturage bagasobanukirwa neza akamaro k’urukingo rwa ko Covid-19 ndetse bagashishikarizwa no kwikingiza ku buryo bwuzuye. Biyemeje kandi ko n’indi mihigo y’ubukangurambaga nko kwitabira ubwisungane mu kwivuza, kwizigamira muri gahunda Ejo-Heza no gukemura ibibazo bibangamiye imibereho y’abaturage itazasigara inyuma.