Uyu munsi tariki ya 7 Werurwe 2024, ku biro bya Pariki ya Gishwati-Mukura, Umuyobozi w'Akarere Wungirije Ushinzwe Iterambere ry'Ubukungu Bwana Uwizeyimana Emmanuel ari kumwe n'Umunyamabanga Nshingwabikorwa w'Intara y'Uburengerazuba Madamu Uwambajemariya Florence bakiriye Umuyobozi muri banki y'isi, Valerie HICKEY, Ushinzwe ibidukikije, umutungo kamere no kubungabunga umutungo w'amazi ku isi.

Aba bashyitsi bari kumwe n'Umuyobozi Mukuru mu kigo cy'Igihugu cy'Iteganyigihe Bwana Aimable Gahigi na Ntabana Alphonsine, Umuyobozi w'Umushinga Volcanoes Community Resilience.

Uruzinduko rwa Madamu Valerie rwari rugamije gusura ibikorwa bitandukanye byakozwe binyuze mu mushinga LAFREC wari ugamije kubungabunga no gusubiranya icyanya cya Pariki ya Gishwati-Mukura aho kugeza ubu iyi Pariki iri mu byanya bikomye by'umurage w'isi ku rutonde rw'ikigo mpuzamahanga cy'umuruango w'abibumbye gishinzwe kureberera uburezi n'umuco ku rwego rw'isi.

Bwana Uwizeyimana yashimiye Banki y'Isi ku nkunga bateye Akarere binyuze mu mushinga LAFREC anagaragaza inyungu uyu mushinga wazanye mu karere, ku gihugu n'isi yose muri rusange. Mu nyungu wazaniye abaturage, harimo guhanga imirimo ku baturage batandukanye, gufasha aborozi kubona amakusanyirizo y'amata agezweho, kuzamura Imibereho y'Abaturage baturiye Gishwati Mukura harimo kubakira abatishoboye no kubana amazi meza binyuze mu nyungu zikomoka kuri Pariki, guteza imbere ubworozi n'izindi.

Bwana Uwizeyimana yijeje ko ubuyobozi, ku bufatanye n'abaturage, buzakomeza gusigasira ibikorwa byagezweho n'Umushinga wa LAFREC bakarinda Pariki ya Gishwati-Mukura by'umwihariko.

Madamu Mukarurinda Rose, Perezida wa Koperative KOGIGIU ikorera ubucuruzi bw'amata mu murenge wa Kigeyo, yashimiye ko LAFREC yabafashije gushinga Koperative ubu bakaba babona umusaruro mwiza ubufasha kwiteza imbere. Yagize ati: "LAFREC itaraza twacuruzaga amata mu kajagari, ufite intege nke akabihomberamo. Ariko uyu munsi, ducuruza dushyize hamwe twese tugasangira inyungu kubera Koperative."

Valerie yashimye uburyo U Rwanda rukoresha neza inkunga ruhabwa n'uburyo rucunga neza imishinga itandukanye igamije guteza abaturage imbere n'isi yose muri rusange. Ati: "URwanda rwabaye Igihugu cy'icyitegererezo aho ibindi bihugu byose bikwiye kureberaho. Ubu U Rwanda ni Igihugu cyigambiriye guteza imbere abaturage kikabakura mu bukene kikabafasha kubona ubukungu uko bikwiye. Ubu abaturage babona ubwishingizi bw'ubuvuzi n'ibindi byinshi ntarondora."

Valerie yashimiye kandi ubufatanye buranga Abayobozi n'abafatanyabikorwa yizeza ko banki y'isi izakomeza ubufatanye n'Igihugu cy'U Rwanda mu gushakira hamwe ibisubizo bigamije Iterambere ry'abaturage.

Nyuma yo kugaragaza ibyakozwe mu kubungabunga Pariki ya Gishwati-Mukura, abashyitsi n'abasangwa basuye Pariki mu rwego rwo kureba uburyo iyi Pariki icunzwe aho Madamu Valerie yashimye ibyagezweho.